Azərbaycanın elektron KİV-də dialoq yoxdur

“Azərbaycan elektron KİV-də plüralizmin olmasını müəyyən etməlidir”, - telejurnalist, elmlər doktoru Qulu Məhərrəmli “Obyektiv TV” telekanalına (obyektiv.tv) bildirib.

Qanunvericiliklə plüralizm müəyyən edilib və təmin olunub. Lakin praktikada həm dövlət, ictimai, həm də özəl teleradio kanallarında başdan-ayağa monoloqdur. BBC, CNN və digər kanallarda təcrübəsi olan Sevinc Osmanqızının verilişləri istisna təşkil edir.   

Azərbaycanda vəziyyət Özbəkistanda və ya Türkmənistanda olduğundan yaxşıdır, lakin Avropa məkanı ilə müqayisə etmək lazımdır, çünki Strasburq və Brüssel tərəfə siyasi prioritetlərin strateji istiqaməti rəsmən bəyan edilib.  

Qanunverici baza öz-özlüyündə bir şey deyil, düzgün implementasiya lazımdır. Milli Teleradio Yayım Şurasının tərkibinə və onun sıralarında rotasiyanın dərəcəsinə görə  

mühakimə yürütmək olar ki, dövlət strukturu kanallarda nəyə nail olmaq istəyir. Hakimiyyət başında duranlar ideoloji möhkəmləndirmə ilə məşğul olmaqdansa yaxşısı budur ki,  dövlət maraqlarının prioritetləri ilə məşğul olsunlar. Məsələn, cənubda Salyan rayonuna, qərbdə Yevlaxa, şimalda Xızıya gedərkən hiss edirsən ki, radioqəbuledici yerli radiodalğaları tutmur. Həmin regionların əhalisi həmsərhəd dövlətlərin ideologiyasının əsirliyindədir.

Qanunda dövlət, özəl, ictimai və bələdiyyə yayımlarının olmasının mümkünlüyü göstərilib. Hələlik bələdiyyə kanalları yoxdur. Dövlət və özəl telekanallar hökumətin nailiyyətlərinin təbliğatına yönəlib. İctimai telekanaldan gözlənti çox olsa da, verilişlərin keyfiyyətinin və ictimai baxımdan nə qədər önəmli olmasının, həmçinin ayrılan vəsaitin xərclənməsinin  monitorinqi aparılmır. Dövlət kanalına ildə on milyonlarla manat vəsait ayrılır, bu vəsait vergiödəyicilərindən alınır, lakin fəaliyyətin nəticələri barədə ictimaiyyətin məlumatı yoxdur. 

Müstəqilliyin əldə olunmasından 21 il ötsə də, sovet təbliğatı sindromu hakimiyyətə təsir göstərir. “Lenin baba” dövrü keçilib və istehza olunub. Lakin ekranlara növbəti “insanpərvər babalar” çıxır və bu, əhalidə rişxənd doğurur. Hakimiyyət qloballaşma əsrinin qələbəsini mənimsəməlidir. Bu gün istənilən istifadəçi hakimiyyətin səfehliyinin reallaşmasını mobil telefona çəkir və sosial şəbəkələrin vasitəsilə yayır.  Dünya balaca kənd kimidir, hamı bir-biri haqqında hər şeyi bilir. Odur ki, həqiqətə başqa cür don geyindirməyin və “evin sirrini verdiyinə görə” jurnalistləri cəzalandırmağın mənası yoxdur. --17D—