Azərbaycan gənclərinə layiqlı iş vəd edilib

Bakı/22.05.18/Turan: Mayın 21-də Bakıda "Dayanıqlı inkişafın məqsədlərinə nail olmaq: dayanıqlı inkişafın və layiqli əməyin təşviqi" mövzusunda konfrans keçirilib. Tədbiri Əmək və Əhalinin Sosial Müdafiəsi Nazirliyi, Azərbaycan Həmkarlar İttifaqları Konfederasiyası, Sahibkarlar (işəgötürənlər) Təşkilatları Milli Konfederesiyası və Beynəlxalq Əmək Təşkilatı (BƏT) təşkil edib.

Forumda Azərbaycan hökumətinin yüksək vəzifəfli nümayəndələri, Milli Məclisin deputatları, beynəlxalq təşkilatların ekspertləri, o cümlədən BƏT-in baş direktoru Qay Rayder iştirak edib. Onun prezident İlham Əliyevlə görüşü olub.

Baş nazirin müavini Əli Əhmədov öz çıxışında qeyd edib ki Azərbaycan əhalisinin 46%-ni 29 yaşınadək gənclər təşkil edir. Gənclərin məşğulluğu aktual problemdir, bunun həlli kompleks yanaşma tələb edir. Son 15 ildə ölkədə 1,9 mln. yeni iş yeri yaradılıb. Bu, əhalinin iqtisadi baxımdan fəal hissəsinin 40%-ni təşkil edir.

"Ölkə əhalisinin sayı hər il 1,1-1,2% artır. Bu o deməkdir ki, əmək bazarına iş axtaran 100 minə yaxın gənc daxil olur. Odur ki, hər il ölkədə ən azı 100 min yeni iş yeri açılır. Əhalinin 45%-dən çoxu kənd yerlərində yaşayır və kənd təsərrüfatı ilə məşğul olur", - Ə.Əhmədov bildirib.

Əmək və əhalinin sosial müdafiəsi naziri Sahil Babayev məşğulluğun təminatı, qeyri-formal məşğulluq problemlərinə toxunub. Onun sözlərinə görə, ötən illərdə ölkə əmək bazarının optimallaşdırılmasında, əhalinin sosial rifahının yaxşılaşdırılmasında mühüm uğurlar əldə edib. Minimal əməkhaqqı 5,2 dəfə, orta əməkhaqqının həcmi 6,6 dəfə artıb. Ölkədə yoxsulluğun səviyyəsi 49%-dən 5%-ə enib. Bundan əlavə, işsizliyin səviyyəsi 5%-ə endirilib. Sözügedən müddətdə milli iqtisadiyyata 230 mlrd. dollardan çox investisiya qoyulub. Bunun yarısı xarici investisiyaların payına düşür.

S.Babayev bildirib ki, Əmək və Əhalinin Sosial Müdafiəsi Nazirliyi qeyri-formal məşğulluğa qarşı mübarizəni, əhalinin sosial rifahının bundan sonra yaxşılaşdırılması, yeni iş yerlərinin yaradılması işini davam etdirəcək.

Əməkçilərin Hüquqlarını Müdafiə Liqasının sədri Sahib Məmmədov yerli əmək bazarında durumu Turan-a şərh edərkən deyib ki, müstəqil araşdırmalara görə, Azərbaycanda 1,5 mln.-dan çox adam qeyri-leqal, yəni əmək müqaviləsi olmadan işləyir. Rəsmi məlumatlara görə, əhalinin iqtisadi baxımdan fəal hissəsini 4,9 mln. nəfər təşkil edir. Qalan hissəni büdcə sahəsinin işçiləri, fərdi biznesi olanlar, işəgötürənlə mülki-hüquqi müqavilə bağlamış şəxslər təşkil edir.

Ekspertin sözlərinə görə, qeyri-leqal əməyin istifadə olunduğu ən geniş yayılan sahələr tikinti, ticarət, məişət xidməti sahələridir. Həmçinin evlərdə çalışan dayələr, xadimələr, sürücülər, şəxsi mühafzə xidməti, bağbanlar v s. var. Bir neçə ilə öncə ölkədə elektron əmək müqaviləsi sisteminin tətbiq edilməsinə baxmayaraq, qeyri-formal məşğulluqla bağlı vəziyyət az dəyişib. İşəgötürənlər tutduqları işçiləri "kölgədən çıxarmaq", maliyyə sənədlərini leqallaşdırmaq, vergi, sosial sığorta haqları ödəmək istəmirlər. Bədbəxtlik bundadır ki, işçilər özləri də buna qarşı çıxmırlar, işəgötürənin şərtləri ilə razılaşmağa məcbur olurlar.-0-