Azərbaycanda uşaqlar və hüquqlar

Bakı/01.06.18/Turan: 1 İyun Uşaqların Beynəlxalq Müdafiəsi Günüdür. Bu barədə BMT Baş Assambleyası 1 iyun 1950-ci ildə qərar qəbul edib.

Azərbaycan Respublikası 21 iyul 1992-ci ildə BMT-nin "Uşaq hüquqları haqqında" Konvensiyasını ratifikasiya edib. Ölkə uşaq hüquqlarının qorunması və müdafiəsi, uşaq əməyinin istismarına qarşı mübarizə ilə bağlı çoxsaylı beynəlxalq sənədlərə qoşulub.

Milli Məclis uşaq hüquqlarının müdafiəsi sahəsində qanunlar qəbul edib. İcra strukturlarında uşaqların hüquqlarını müdafiə edən qurumlar fəaliyyət göstərir. Hökumət uşaqlarla bağlı dövlət proqramlarını həyata keçirir.

Dövlət Statistika Komitəsinin məlumatına görə, 2017-ci ildə Azərbaycanda 2 219,8 milyon uşaq (0-14 yaş) olub. Əhalinin hər min nəfərindən 318-i 14 yaşınadək olanlardır. Ölkədə 4427 ümumtəhsil məktəbi, 1750 məktəbəqədər təhsil müəssisəsi fəaliyyət göstərir. 156 min müəllim var.

Bu gün dünyanın əksər ölkələrində olduğu kimi, Azərbaycanda da Uşaqların Beynəlxalq Müdafiəsi Günü qeyd edilir. Ölkədə uşaqlarla bağlı müxtəlif konfranslar, konsertlər, şənliklər keçirilir. Bu il əvvəlki illərdən fərqli tədbirlər də qeydə alınıb. Belə ki, Bakı metropolitenində qatarlarda və stansiyalarda bütün elanları uşaqlar oxuyub.

Uşaq Hüquqlarını Müdafiə Liqasının rəhbəri Yusif Bəkirov Turan-a bildirib ki, Azərbaycanda uşaqların hüquqları dövlət tərəfindən qiorunur.

"Amma, uşaq hüquqlarının qorunması ilə bağlı aparılan işlər bizi təmin etmir. İstəyirik ki, uşaq hüquqları BMT-nin Uşaq Hüquqları Konvensiyasında nəzərdə tutulmuş səviyyədə tam qorunsun", deyə o qeyd edib.

Bəkirov ölkədə uşaqlara pulsuz səhiyyə xidmətləri göstərildiyini, pulsuz təhsil verildiyini deyib. Bununla yanaşı, pullu səhiyyə və pullu təhsil müəssisələri də fəaliyyət göstərir.

"Ölkənin hər yerində uşaq poliklinikaları və məktəblər var. Amma uşaqların keyfiyyətli tibbi yardımla tam əhatə olunduğunu demək mümkün deyil. Ona görə ki, yaxşı və ya pis tibbi xidmət göstərən həkimlər, poliklinikalar var".

Ekspert hesab edir ki, ölkədə uşaqların 100 faizə yaxını təhsilə cəlb olunur.

"Ancaq keyfiyyətli təhsil məsələsində problemlər var. Bu, həllini tapmalıdır. Çünki ali məktəblərə qəbul olunanların əksəriyyəti repetitor yanına gedir", deyə o qeyd edib.

Bəkirov valideyn himayəsindən məhrum olan uşaqlara hökumətin qəyyumluq etdiyini bildirib.

"Onlar internatlarda qalırlar. Bu uşaqların hüquqları da digər uşaqlarla eyni səviyyədə qorunur, onlar təhsilə cəlb olunurlar".

Ekspert uşaq əməyinin istismarı məsələsinə də toxunub.

"Uşaq əməyinin istismarı cüzidir. Çünki sosial vəziyyət o qədər ağırdır ki, böyüklər iş tapa bilmir. Uşaq əməyini əsasən valideynləri istismar edir. Belə hallar əsasən kəndlərdə baş verir. Valideynlər uşaqlarını fermalarda, tarlalarda işlədirlər. Şəhərlərdə isə bəzi hallarda avtomobillərin yudurdulmasında və başqa cüzi işlərdə uşaq əməyindən istifadə olunur", deyə o qeyd edib.

Bəkirov küçədə yaşayan uşaqlarla bağlı problemlərin də qaldığını deyib.

"Dövlət bu problemi də həll etməlidir. Doğrudur, küçədə yaşayan uşaqlar üçün sığınacaqlar açılıb. Amma bu, problemin tam həlli deyil", deyə Bəkirov qeyd edib. -03B-