![Media-icmal 15.04.20](https://turan.az/resized/750/500/resize/media/2020/main/041500025867.jpg)
Koronavirus pandemiyasına qarşı görülən tədbirlər, OPEC+ formatında verilmiş qərarın neftin qiymətlərinə mümkün təsiri, pandemiya fonunda oruc olmağın mümkünlüyünə baxış və s. məsələlər medianın aparıcı mövzusu olaraq qalmaqda davam edir...
“Azərbaycan” qəzeti “Azərbaycanda koronavirusun qarşısının alınması üçün çevik addımlar atılır” sərlövhəli məqalədə ölkədə koronavirus pandemiyasına qarşı görülən tədbirləri dəyərləndirir.
Müəllifin sözlərinə görə, bütün dünyanı sürətlə çənginə alan ölümcül yeni tip koronavirusa ilk yoluxma hadisəsindən 100 gündən çox vaxt keçir, bu müddət ərzində infeksiyadan ölənlərin sayı 100 min nəfəri keçib, yoluxanların sayı isə iki milyon nəfərə yaxınlaşır.
Konkret olaraq Azərbaycanda bununla bağlı vəziyyət barədə danışan müəllif deyir ki, başqa ölkələrlə müqayisədə Azərbaycanda xəstəlik çox da geniş yayılmayıb: “Qabaqlayıcı tədbirlər nəticəsində ölkədə yoluxmalar və ölüm sayı aşağı olaraq qalmaqdadır. Koronavirus xəstəliyinin ölkəmizdə yayılmasının qarşısının alınması üçün çevik və zəruri qabaqlayıcı addımlar atılır, yaranmış şəraitə uyğun məhdudlaşdırıcı tədbirlər görülür”, deyə müəllif qeyd edir.
Müəllif Nazirlər Kabineti yanında Operativ Qərargah yaradılmasını, orta və ali məktəblərdə tədrisin dayandırırlmasını, hərəkət məhdudiyyəti tətbiq edilməsini görülən tədbirlər sırasında göstərir.
Müəllif bu tədbirlərin görülməsini yüksək dəyərləndirir, amma bəzi vətəndaşları məsuliyyətsiz olmaqda, karantin rejimini pozmaqda təqsirli bilir.
Onun sözlərinə görə, vətəndaşların 8103 SMS icazə sistemindən sui-istifadə hallarına yol verdiyi də müəyyən olunub.
Müəllifin sözlərinə görə, bundan irəli gələrək, Operativ Qərargah təcrid qaydalarının sərtləşdirilməsinin günün tələbinə çevrilməkdə olduğunu iddia
edir. Məqalədə qərargaha istinadən deyilir ki, qlobal təhlükənin qarşısını almaq üçün dövlət lazım olan ən səmərəli tədbirləri həyata keçirir, əhali də bu tədbirlərə dəstək olmalıdır. “Hamı karantin rejiminin qaydalarına əməl etsə, məsuliyyətli, nizam-intizamlı olsa, koronavirusun yayılmasının qarşısını ala biləcək, bu xəstəliyə birlikdə qalib gələcəyik”, deyə müəllif yazır.
“Müsavat.com”da yer alan “OPEC+ razılşması neftin qiymətini nə qədər artıracaq” sərlövhəli məqalədə isə bu il aprelin 9-da OPEC+ formatında neft hasilatının 9,7 milyon barel azaldılması ilə bağlı verilmiş qərarın neft bazarında qiymətlərə mümkün təsiri dəyərləndirilir.
İqtisadçı-ekspert Pərviz Heydərov hesab edir ki, bu qərar neft bazarını qiymət xaosundan qoruya bilib və koronavirus pandemiyasının dünyada neftə tələbatı kəskin azaltdığı bir dövrdə ortaq məxrəcə gələ bilməyin özü mühüm əhəmiyyət kəsb edir.
Ekspertə görə, koronavirus pandemiyasının mənfi təsiri fonunda OPEK+ razılaşması dünya bazarında qiymətlərə 10 dollara yaxın müsbət təsir edib, bu, bir növ qiymətlərdə ən aşağı həddin formalaşmasına səbəb olub.
P.Heydərovun sözlərinə görə, may ayının əvvəlində bu qiymətin bir qədər də yüksələcəyi gözləniləndir: “Lakin qiymətlərin yalnız bu ilin sonunadək 40-45 dollara çatması ehtimalı var. Yaxın bir neçə ay ərzində isə 35-40 dollara qədər yüksələ bilər. O da bir şərtlə ki, mayın əvvəlindən pandemiyanın səngiməsinə nail olunsun”.
Ekspert hesab edir ki, Azərbaycanın OPEK+ çərçivəsində üzərinə götürdüyü öhdəliyə əməl etməsi çətinlik yaratmayacaq, çünki ölkədə hasilatın təbii azalması prosesi gedir: “Bizdə onsuz da son illərdə hasilatın səviyyəsində təbii azalma gedirdi. Bu baxımdan, götürülən öhdəliyə əməl etmək ciddi çətinlik yaratmayacaq”.
“Sfera.az”da dərc olunan “Koronavirus pandemiyası günlərində oruc tutmaq olar?” sərlövhəli məqalədə müəllif bəhs olunan mövzu ilə bağlı tibb mütəxəssisləri və dinşünaslarla söhbətləşir.
Mövzunun aktuallığı bundan ibarətdir ki, aprelin 25-də Ramazan ayı və orucluq başlayır. Digər tərəfdən, dünyanın əksər ölkələri kimi, Azərbaycanda da koronavirus pandemiyası mövcuddur və belə şəraitdə oruc tutub-tutmamaq kimi məsələ müzakirəyə gətirilir.
Tibb elmləri doktoru Adil Qeybulla hesab edir ki, hazırki vəziyyətdə immun sistemini, sağlamlığı qorumaq orucdan daha vacibdir. Onun fikrincə, pandemiyanın davam etdiyi bir dövrdə oruc tutmaq məqsədəuyğun sayılmır.
A.Qeybulla hesab edir ki, indiki halda immun sistem bunu etməyə imkan vermir, çünki orucluq tək dinlə bağlı amil deyil, ciddi bir məsələdir, bunu təxirə salmaq da olar: “Hesab edirəm ki, onu bir müddət təxirə salmaq olar. Buna insanlar özləri qərar versələr yaxşıdır, ancaq düşünürəm ki, yaranmış situasiyada immun sistemini, sağlamlığı qorumaq orucdan daha vacibdir”.
Dinşünas Vaqif Cəliloğlu deyir ki, orucluq dini anlama görə böyük cihaddır, nəfsə qarşı mübarizədir.
Daha sonra isə əlavə edir: “Unutmayaq ki, Kəbə, namaz, oruc, fitrə, zəkat, bütün dini ehkamların hamısı insan tərəfindən, Allahın yerdəki xəlifəsi tərəfindən edilir. Bu xəlifə xəstə, koronavirusa qarşı immuniteti zəif olarsa, onun orucunun heç bir fəziləti ola bilməz. İnsan özünü qorumalıdır. Oruc insanın immun sistemini zəiflədərsə, ondan imtina etməli, yalnız koronavirus aradan qalxdıqdan sonra orucunu davam etdirməlidir”.
Rəy yaz