Media-icmal 25.04.20

Koronavirus pandemiyasına qarşı mübarizə, neft bazarında vəziyyət, virusun təkrar yayıla bilməsi riskləri, bu sahədə pik həddin keçilməsi və s. məsələlər ölkə mediasının aparıcı mövzuları sırasındadır...

“Azərbaycan” qəzetində yer alan “Azərbaycan koronavirusla mübarizə üsuluna görə dünyada ön sıralardadır” sərlövhəli məqalədə müəllif Azərbacanda koronavirus pandemiyasına qarşı mübarizəni dəyərləndirir.

Müəllif deyir ki, son sutka ərzində planetdə bu infeksiyaya daha 80 960 nəfər yoluxub, bununla da dünyada koronavirusa yoluxanların sayı 2 708 590 nəfər olub, daha sonra ayrı-ayrı ölkələrdə pandemiya ilə bağlı vəziyyətə dair statistik rəqəmlər göstərir.

Müəllif hesab edir ki, Azərbaycan koronavirusa qarşı mübarizədə nümunə göstərir, dövlət rəhbəriyi səviyyəsində Azərbaycanda pandemiyanın təsirinin azaldılmasına qarşı mübarizə gedir. 

Müəllif əlavə edib ki, dövlət bütün imkanlarını virusun yayılmasının qarşısının alınmasına səfərbər edib: “Azərbaycan dünyada aparıcı ölkələrdəndir ki, on minlərlə insan qısa müddət ərzində müayinə edilib və əhali koronavirus infeksiyası ilə əlaqədar testdən keçirilib”.

Müəllifə görə, tibbi baxımdan ən inkişaf etmiş ölkələrin belə bu xəstəliklə mübarizədə aciz qaldığı bir vaxtda Azərbaycan rəhbərliyi pandemiyanın təsirinin azaldılması istiqamətində mühüm addımlar atılıb.

Müəllif deyir ki, ÜST və bir sıra Avropa ölkələrinin rəsmiləri bu bəlaya qarşı mübarizədə Azərbaycanın gördüyü tədbirləri yüksək qiymətləndirirlər.

“Modern.az”da isə “Neft gəlirlərimiz azalır, vəziyyətdən necə çıxacağıq?” sərlövhəli məqalədə müəllif neft gəlirlərinin azalması fonunda Azərbaycanın iqtisadi vəziyyətini deputatlarla dəyərləndirir.

Müəllif deyir ki, dünya bazarında neftin qiyməti kəskin ucuzlaşıb, buna da səbəb koronavirus pandemiyası şəraitində neftə tələbatın azalmasıdır.

Deputat Vahid Əhmədova görə, dünya neft bazarında təklif tələbi üstələdiyi üçün belə bir problem yaranır və bu, bir müddət belə davam edəcək, müəyyən vaxtda neftə tələb az olacaq, qiymətlərdə artım olmayacaq.

V.Əhmədov hesab edir ki, neftin qiyməti mənfiyə doğru gedərsə, ciddi problemlər yaşahar, odur ki, ciddi addımlar atılmalıdır ki, qeyri-neft sektorunun əsas sahələri, xaricə məhsul çıxarılmasına xidmət edən sahələr inkişaf etdirilməlidir. 

Deputat Ziyad Səmədzadə də koronavirus pandemiyası ilə əlaqədar olaraq dünya bazarında neftin qiymətinin aşağı düşməsini təbii proses adlandırır.

Z.Səmədzadə hesab edir ki, indi pandemiya şəraitində neft amili siyasi oyunların təsirinə də məruz qalır.

Deputat pandemiyanın təsirilə dünya bazarında neftin qiymətinin aşağı düşməsi fonunda ölkənin gəlirlərinin də azaldılmasına diqqət çəkir.

Deputat Vüqar Bayramov isə deyir ki, hazırda neft bazarında gündəlik 29 milyon barel neft artıqlığı var və OPEC ölkələrinin son razılaşması belə neftin qiymətinin artmasına kömək etməyəcək.

V.Bayramov hesab edir ki, növbəti dövrlər üçün də neftin qiymətində ciddi artım gözlənilmir.

“Oxu.az” isə “TƏBİB sədrindən koronavirusla bağlı xəbərdarlıq - Ən böyük təhlükə qarşıdadır” (https://oxu.az/society/383381) sərlövhəli məqalədə Azərbaycanda koronavirus pandemiyası ilə bağlı durumu Tibbi Ərazi Bölmələrini İdarəetmə Birliyinin rəhbəri Ramin Bayramlı ilə gündəmin müzakirəsinə daşıyır.

İdarə rəhbəri vurğulayır ki, Azərbaycanda karantin rejimi ilə koronavirusun yayılmasının qarşısı alınıb.

R.Bayramlı əlavə edir ki, sərhədlərn bağlanması ilə virusun xaricdən ölkəyə mümkün idxalının qarşısı alınıb.

“Sosial izolyasiya tədbirləri görülüb və xüsusi karantin rejimi elan edilib. Xüsusi karantin rejimi 4 maya qədər uzadılıb. Lakin bugünki (aprelin 24-ü nəzərdə tutulur - red.) qərarla bəzi yumşaldılmalar olub”.

Bununla belə, R.Bayramlı böyük təhlükə gözləntisinin gözardı edilməməsini vurğulayıb və karantin tədbirlərinin tam aradan qaldırılması ilə pandemiyanın ikinci dalğasının başlaya biləcəyini də istisna etməyib.

Onun fikrincə, əhalinin kütləvi yoluxması nəticəsində reanimasion tədbirlər tələb edən hallar arta bilər, xəstəlik hələ bitməyib və ən böyük təhlükə qarşıdadır: “Bizim üzərimizə sosial məsuliyyət düşür. Yoluxmanın yayılmasının nəzarət altında saxlanılması vacibdir. Qətiyyən arxayınlaşmamalıyıq. Düşmənin “bir nəfəs qədər” yaxın olduğunu fikrimizdən çıxarmamalıyıq”.

“Marja.az”da dərc edilən  “Azərbaycanda koronavirusa yoluxmanın pik həddi başa çatıb" sərlövhəli məqalədə isə müəllif  Ümumdünya Səhiyyə Təşkilatının (ÜST) Azərbaycandakı nümayəndəsi Hande Harmancı ilə ölkə və dünya çapında  koronavirus pandemiyası ilə bağlı vəziyyəti dəyərləndirib.

H.Harmançının sözlərinə görə, Azərbaycanda koronavirusa yoluxma sayının artması, sonradan azalması göstəricisinə baxdıqda həmin vaxtın pik həddiolduğunu deməyə əsas verir.

ÜST məsulu deyir ki, ölkədə hələ də koronavirusa yoluxma halları bitməyib: “Əgər karantin rejimi yumşalsa yenidən virusa yoluxmanın artması riski ola bilər. Ona görə də əhali qaydalara ciddi əməl etməlidir. Hələ ki, vəziyyəti nəzarət altına ala bilmişik”.

H.Harmançı bunu da diqqətə çatdırıb ki, bir çox ölkələr, o cümlədən Azərbaycan da ÜST-ün tövsiyələrinə uyğun karantin rejimindən çıxış planı hazırlayır.

Tədbirləri yüngülləşdirməklə yanaşı, təhlükəsizlik tədbirlərini yüksək səviyyədə saxlamaq lazımdır: “Çünki virus hələ də öz təhlükəsini saxlayır. Xəstəlik yenidən alovlana bilər. Hər kəs əvvəlki həyatına qayıtmaq istəyir. Bizim də istəyimiz budur”.

Sərhədlərin açılmasına gəlincə, H.Harmancı əlavə edib ki, bu məsələdə əsas hədəf ölkələrin bir-birinə güvənməsidir və hər iki qonşu ölkə sanitar epidrmoloji vəziyyətin ölkədə qənaətbəxş olduğunu sübut etməidir, bütünlükdə isə ölkələr ciddi əməkdaşlıq çərçivəsində bu məsələni müzakirə etməlidirlər.