Bakıda Qoşulmama Hərəkatı ölkələri rəhbərlərinin zirvə görüşü işinə başlayıb

Bakı/25.10.19/Turan: Bu gün Bakıda 158 dövlət, hökumət, xarici işlər naziri, habelə beynəlxalq təşkilat rəhbərinin iştirakı ilə Qoşulmama Hərəkatının XVIII sammiti açılıb.

İclası Hərəkatın fəaliyyətdə olan sədri, Venesuelanın rəhbəri Nikolas Maduro açıb. Onun təklifi ilə iştirakçılar sonuncu sammitdən sonra dünyasını dəyişmiş  dövlət başçılarının xatirəsini  hörmətlə anıblar.

Zirvə görüşünə gəlmiş dövlət və hökumət başçıları arasında İran, Əlcəzair, Əfqanıstan, Namibiya, Venesuela, Sudan, Kuba, Qana, Cibuti, Pakistan və  Türkmənistan prezidentləri, Liviya, Nepal, Bangladeş və Malayziya baş nazirləri, Esvati kralı,  Bosniya və Herseqovina Rəyasət Heyətinin sədri (müşahidəçi) vardır.

Sammitdən əvvəl oktyabrın  22-23-də  yüksək səviyyəli rəsmi şəxslərin və 23-24-də xarici işlər nazirlərinin görüşləri keçirilib.

Sabah başa çatacaq zirvə görüşündə  4 sənədin - Yekun Sənədi, Bakı Siyasi Bəyannaməsi, Qəbul edən ölkəyə təşəkkür və Fələstin üzrə Bəyannamənin qəbul ediləcəyi gözlənilir.

İlk üç sənəddə Azərbaycanın Qarabağ münaqişəsi və digər xarici siyasət prioritetləri ilə bağlı mövqeləri əksini tapacaqdır. Sammit Qoşulmama Hərəkatının 2016-cı ildə Venesuela sammitində Azərbaycanın ərazi bütövlüyü və münaqişənin beynəlxalq münasibətlərin bu prinsipi əsasında həll edilməsinin vacibliyini  dəstəklədiyini  təsdiqləyəcəkdir.

Sammit ərəfəsində Qoşulmama Hərəkatının sədrliyi üç il müddətində Venesueladan Azərbaycana keçəcəkdir. Azərbaycanın prioritetləri Qoşulmama Hərəkatının məqsədlərinə –  sülhün və təhlükəsizliyin  qorunması, bəşəriyyətin tərəqqisinə töhfə verilməsi – çatmaq üzrə  gələcək səylər olacaqdır.

Bundan başqa, Bakı Qoşulmama Hərəkatının daxili həmrəyliyin artmasına,  təşkilatın beynəlxalq aləmdə nüfuzunun möhkəmlənməsinə və 1955-ci ildə qəbul edilmiş Bandung prinsiplərinin təbliğinə çalışacaqdır.

Qoşulmama Hərəkatı   1961-ci ildə yaradılıb və bu günə 120 dövləti ehtiva edir və BMT Baş Assambleysından sonra dövlətlərin ikinci ən iri  beynəlxalq siyasi platformasıdır. Azərbaycan 2011-ci ildən GH-nin üzvüdür. - 06D-