Ermənistanın Azərbaycanı atəşə tutan raket qurğuları məhv edilməlidir

Bakı/05.10.20/Turan: Oktyabrın 4-də axşamdan keçmiş Ermənistan Silahlı Qüvvələri Mingəçevir şəhərinə və oradakı enerji qovşağına raket zərbəsi endirib. Raketlərin biri Mingəçevir İES-in qarşısına düşüb və partlamayıb. Digər raket yaşayış evinin yanında düşüb, o da partlamayıb. Üçüncü fərdi evə düşüb və beş sakini ağır yaralayıb. Azərbaycanın enerji sisteminə ziyan dəyməyib.

Bu gün Gəncə yenidən atəşə tutulub, raketlər Ermənistanın Berd rayonundan atılıb.

Elektroenergetika, neft-qaz məhsullarının hasilatı, emalı və tranziti üzrə regional mərkəz sayılan Azərbaycan özünün əsas iqtisadi potensialını - neft və qaz kəmərlərini, energetika obyektlərini qorumağa qadirdirmi?

Enerji resursları sahəsində ekspert İlham Şaban bu suallara cavab verib.  

- Bizim qaz və neft kəmərlərimiz texniki baxımdan nə qədər qorunur?

- Azərbaycanda işğal olunmuş torpaqların işğaldan azad edilməsinə görə xalq eyforiyası hökm sürür, lakin təhlükəni də yada salmaq lazımdır. Ermənilər bundan öncə də Mingəçevir SES-i dağıtmaqla hədələyirdilər. Ancaq onların silahlanması köhnədir və istənilən nəticəni vermir.

Azərbaycan boru kəmərləri torpağa basdırılıb və 20 santimetrlik beton örtüklə qorunur. Ancaq biz telekanallarından birinin nümayiş etdirdiyi kimi, Tərtərdə raket düşməsindən sonra yaranmış 10 metrlik çuxuru gördük. Belə zərbə boru kəmərlərinə təhlükə yaradır.

- Azərbaycan layihələrində iştirak edən xarici şirkətlər bu obyektlərin təhlükəsizliyinin təmin edilməsində hansısa şəkildə iştirak etməlidirlər?

- Müqavilələrdə aydın göstərilir ki, boru kəmərlərinin istismarı zamanı bütün təhlükəsizlik məsələləri Azərbaycan hökumətinin üzərinə düşür. Dövlət bu dörd boru kəmərinin marşrutunu müəyyən edərkən bilirdi ki, onların keçdiyi Şəmkir Və Gədəbəy yaxındır. Deməli, həmin obyektlərin düşmən hücumlarından qorunması Müdafiə Nazirliyinin vəzifəsidir.

2020-ci ilin iyulunda ermənilərin Tovuzda təcavüzünün məqsədi bu obyektlərə çatmaq idi, Azərbaycana terrorçu qrup göndərilmişdi, lakin əsgərlərimiz tərəfindən zərərsizləşdirildi. O zaman ordu öz vəzifəsini yerinə yetirdi. Dünən Ermənistan ərazisindən Abşerona və Xızıya buraxılmış iki raket Xızıda və Bakıya bilavasitə bitişik Abşeron rayonuna düşüb. Hər iki raket 300 km.-dək məsafəli olub. Ermənilər Səngəçal neft terminalı, Neft daşları, Dərin Özüllər Zavodu və s. atəş aça bilər.

Azərbaycanda istənilən hədəf üzrə bütün raket hücumları dəf edilməlidir və bundan ötrü ölkə lazımi HHM sistemləri alıb. Biz müharibənin ilk günündə Dağlıq Qarabağda 15 “OCA” HHM vasitəsini məhv edə bildik.

- Azərbaycanda bəzi ekspertlər buna cavab olaraq Metsamor AES-i vurmağa çağırırlar.

    - Belə təkliflər yolverilməzdir. Atom obyektlərini partlatmaq olmaz. Əgər onlar partlasa uzaqda yaşayan insanlar da zərər çəkəcək. Məğlubiyyət zonasında Naxçıvan və Türkiyə sakinləri də olacaq, əlverişli hava şəraitində radiasiya təzyiqi Bakıya da çatacaq. Ermənistanda daha yaxşı hədəf var- Yerevanın yaxınlığında böyük su anbarı və bəndi olan su qovşağı var. Azərbaycan ermənilərin səviyyəsinə enməməli və iqtisadi obyektlərə atəş açmamalıdır. Eyni zamanda bizim raketlərlə Xankəndində elektrik yarımstansiyasının dağıdılmasını düzgün hesab edirəm. Çünki o, düşmənin hərbi qurğularını təchiz edirdi. İndi bu şəhər dizel elektrik generatorları ilə təmin olunur.

- Azərbaycan Avropaya neft nəql edir. Avropa ölkələri Ermənistanın bizim ixrac boru kəmərlərimizi necə məhv etməyə çalışdığını laqeyd şəkildə müşahidə edə bilərlərmi?

  - 2008-ci ildə Gürcüstan Cənubi Osetiyada müharibə aparanda Bakı-Tbilisi-Ceyhan neft kəməri işini bir həftə dayandırdı. Avropa ilə heç bir şey olmadı, onlar Gürcüstana kömək etmədilər. Azərbaycanla da elə. Biz hərbi cinayətdən çəkinməyən məkrli təcavüzkarla təkbətək qalmışıq.

Ordu Ermənistan ərazisinə raket buraxılışı nöqtələrini izləyir. Ona görə də buraxılış qurğuları təcili və əsaslı şəkildə məhv edilməlidir. Bu, problemin effektiv həllinin yeganə yoludur.-0-