Gürcüstanın �humanizm dəyərləri�

Gürcüstana sığınmış araşdırmaçı jurnalist Əfqan Muxtarlı Azərbaycan hakimiyyət orqanları tərəfindən oğurlanıb. O, son vaxtlar izləndiyi barədə dəfələrlə açıqlama vermişdi. Əfqan daha çox Azərbaycan hakimiyyətinin yuxarı eşalonunun korrupsiya əməllərini araşdıran bir jurnalist idi və zatən peşəsi oğurluq, quldurluq, rüşvətxorluq olan bir rejimin Əfqanı oğurlamasında təəccüblü bir şey yoxdur. Çünki biz dəfələrlə ölkəmizdə tənqidçi jurnalistlərin, vətəndaş cəmiyyəti təmsilçilərinin, blogerlərin və siyasilərin oğurlanmasının, onların üstündən maşın sürülməsinin, beyninə güllə çaxılmasının, istintaq altında olan insanların həbs düşərgələrində işgəncə verilərək öldürülməsinin şahidi olmuşuq. Zatən bu kriminal əməllər Azərbaycan hakimiyyətinin mahiyyətidir.

Lakin təəccüblüsü odur ki, Əfqan pənahəndə olduğu Gürcüstanın paytaxtı Tbilisi şəhərindən oğurlanıb və Avropa dəyərlərinə iddialı, Avropa Birliyi üzvlüyünə hazırlaşan, bu coğrafiyaya vizasız gediş-gəliş əldə etmiş bir ölkənin hakimiyyəti bilavasitə bu oğurluq faktında iştirak edib. Dünən Gürcüstanın müxtəlif rəhbər vəzifəli şəxsləri bir-birini təkzib edən açıqlamalar verdilər. Lakin bircə şeyə aydınlıq gətirilmədi: Gürcüstanın sərhəd xidməti üzərində şəxsiyyətini təsdiq edən sənədi, pasportu olmayan bir adamı (zənbilə qoyulan əşyanı deyil, məhz adamı) öz sərhədlərindən necə buraxıb? Axı, burada söhbət adam oğurluğundan, insan qaçaqmalçılığından gedirdi. İnsan haqları ilə bağlı beynəlxalq öhdəliyi olan və bu istiqamətdə özünü regionun lider dövləti hesab edən bir ölkənin hakimiyyəti tənqidçi bir jurnalistin Azərbaycanın kriminal və repressiv hakimiyyət orqanları tərəfindən oğurlanmasına sadəcə biganə, laqeyd qalmayıb, bilavasitə prosesin iştirakçısı olub.

Şübhəsiz ki, öz özlüyündə sərhəd xidməti oğurlanmış adamı heç bir sənədi olmadan özbaşına sərhəddən buraxa bilməzdi. Hətta, bir vaxtlar Gürcüstandan diri mal-qara gətirən ət alverçiləri etiraf edirdilər ki, oğurluq heyvanı Gürcüstan sərhəddindən, Gürcüstan gömrüyündən keçirmək mümkün deyil. Çünki hər baş heyvan üçün sərhəd-gömrük məntəqəsində ayrıca anket məlumatları doldurulur. Bu halda oğurlanmış jurnalist necə belə asanlıqla qazdan ayıq Gürcüstan sərhəd və gömrük xidmətinin gözündən "yayınıb". Bu yalnız Gürcüstanın səlahiyyətli orqanlarının bir-başa tapşırığı ilə baş verə bilərdi və yəqin ki, belə də olub. Bu günə qədər Gürcüstanın sərhəd xidməti oğurlanmış adamı sərhəddən belə "asanlıqla" niyə və nə üçün buraxdığına aydınlıq gətirməyib.

Azərbaycanın sərhəd, gömrük, hüquq mühafizə və xüsusi xidmət orqanları isə sadəcə qanunsuz əməllərin dünya dərsliklərinə düşə biləcək nümunələrini yaradırlar. Xarici pasportu və sənədləri üstündə olmayan adamı qonşu ölkənin paytaxtından oğurlayıb, sənədsiz adamı "oğurluq mal" kimi çox asanlıqla xarici dövlətin sərhəd, gömrük xidmətindən "keçirib" və Azərbaycan sərhəd məntəqəsində onu sərhəd pozucusu kimi sənədləşdirib həbs edib. Cibində vur tut 2 lari çörək pulu olan bir jurnalistin cibinə səxavət göstərib 10 min Avro pul da qoyublar ki, onu həm də qaçaqmalçılıqda ittiham etsinlər. Vəkilin məlumatına görə bu proseslər zamanı jurnalistə ağır işgəncə verilib. Hətta, bu işgəncələr nəticəsində qabırğalarının sındırildığı istisna edilmir. Elə bunu da nəzərə alaraq hüquq mühafizə orqanları Əfqana qarşı üçüncü bir ittiham - hakimiyyət orqanlarının əməkdaşlarına, yəni bilavasitə Tbilisidə onu oğurlayan şəxslərə müqavimət göstərmək maddəsini də əlavə edib. Belə cəfəng "hüquqi" detektivə ancaq mafiya filmlərində rast gəlinə bilər.

Şübhəsiz ki, tənqidçi jurnalist Əfqan Muxtarlının Tbilisidən oğurlanması, tanınmış həkim-professor Fərman Ceyranlının müəmmalı həbsi, AXCP sədrinin müavini və Milli Şuranın Koordinasiya Mərkəzinin üzvü Gözəl Bayramlının Gürcüstan - Azərbaycan sərhəddində qurama ittihamla saxlanması, bir müddət Tbilisidə yaşamış bloger Mehman Qələndərovun ölkəyə dönüşündən sonra müvəqqəti cəzaçəkmə müəssisəsində qəfil "intiharı" eyni prosesin müxtəlif epizodlarıdır və kiçik istisnalarla bu prosesi Azərbaycanın kriminal-korrupsioner hakimiyyəti ilə Gürcüstanın "humanizm dəyərlərinə" söykənən rəhbərlərliyi birgə həyata keçirirlər.