Qarabağın bərpası haqda videoçarx rəsmi Bakının öhdəliyi kimi..

AzTV dövlət telekanalının ötən həftədən göstərdiyi videoçarxda kompüter qrafikası yolu ilə Azərbaycan ordusunun Qarabağda qələbəsi ilə başa çatan müharibə təsvir edilb. Raketlər erməni hədəflərini dağıdır, artilleriya blindajları məhv edir, tanklar üşmənə doğru hərəkət edir. Azərbaycanın rəmzi olan ağbaşlı qartal Qarabağın üzərində uçur və keçmiş AzSSR KP Dağlıq Qarabağ Vilayət Komitəsinin binası üzərinə qonur. Bina dərhal yeni görünüş alır, onun qarşısında isə Heydər Əliyevin abidəsi ucalır. Şuşada dağıdılmış tarixi binalar göz önündə dəyişərək Bakıdakı üzlüklənmiş binalara bənzəyən evlərlə əvəzlənir. Şuşada "xruşşovka"ların yerinə komfortabelli villalar yüksəlir, mərkəzi meydan isə Azərbaycan bayrağının ucaldıldığı yerə çevrilir.

Rəsmi Bakı ilk dəfə belə videoçarx nümayiş etdirir ki, bu da dövlətin Azərbaycan silahının gücü ilə qalib gəlməsini anons edir və bunu dövlətin qarşısında öhdəlik kimi qoyur. Dövlət təbliğatı dinc danışıqların müzakirəsini kənarda qoyaraq militarist əhval-ruhiyyəyə köklənib. Ordunun 100 illiyi münasibətilə keçirilən paradda Azərbaycanın işğal edilmiş bütün ərazilərinin mütləq azad olunacağını vəd edən İ.Əliyevin sözlərindən sitat gətirilir.

İlk dəfə olaraq Azərbaycan tərəfi Qarabağ probleminin yalnız hərbi yolla həllinin mümkünlüyünü gizlətmir. İlk dəfə olaraq açıq şəkildə bildirilir ki, "Azərkosmos" ASC işğal olunmuş əraziləri müşahidə edir. Ekologiya və Təbii Sərvətlər Nazirliyi "Azersky" peykindən fotoçəkilişləri nümayiş etdirir. Çəkilişlərdə Ağdam rayonu görünür. Müdafiə naziri Zakir Həsənov müsahibəsində deyib ki, ekranlarda onlayn rejimində işğal olunmuş ərazilərdəki istənilən yeri dəqiqliklə müşahidə etmək olar.

Şənbə günü Z.Həsənov bir daha təkrar edib ki, problem "tezliklə" nizamlanmasa Qarabağda hərbi əməliyyatların bərpasını istisna etmir.

Nazirin 2-6 iyul təlimlərində qoşunların qarşısına qoyduğu vəzifələr diqqəti çəkir. İşğal olunmuş ərazilərin azad edilməsi üzrə müxtəlif ssenarilərə əsasən qoşunların tətbiqi və hərbi tapşırıqların icraşı, o cümlədən düşmənin hərbi infrastrukturunun məhv edilməsi üçün nəzərdə tutulan müasir silahların və hərbi texnikanın tətbiqi hazırlanır", - Azərbaycan Müdafiə Nazirliyinin məlumatında deyilir.

Ermənistanda Azərbaycana psixoloji təzyiq davam edir. Baş nazir Nikol Paşinyan Bakıda keçirilən hərbi parada Ermənistan SQ-nin yaradılmasının 26 illiyi münasibətilə Yerevanın üzərində hərbi təyyarələrin uçuşu ilə cavab verdi. "Havada və yerdə biz müdafiəyə və əks-zərbəyə hazırıq. Cəsarətlə!", - baş nazir sosial şəbəkələrdə yazıb. O, danışıqlara Dağlıq Qarabağın erməni rəhbərliyinin cəlb edilməsi barədə irəli sürdüyü təklifdən imtina etmədiyini bildirib.

1993-cü ildən bu yana düşmənçilik edən tərəflər müharibəyə indiki qədər yaxın olmayıblar. Ermənilərə Azərbaycan SQ-nin Naxçıvan istiqamətində ordumuzun mövqelərini irəli çəkməsindən irəli gələn mənəvi təzyiqləri də əlavə edək. Bu əməliyyatlar nəticəsində ilk dəfə olaraq erməni kəndi və respublika əhəmiyyətli avtomobil yolu birbaşa hipotetik atəşə məruz qaldı.

2016-cı ilin aprelində dördgünlük döyüşlər zamanı da gərginlik bu qədər yüksək deyildi.

Ermənistanda ekspertlər fərqli fikirlər söyləyirlər. Bəziləri bildirir ki, Bakı sarsıdıcı cavab atəşi alacağından qorxaraq yeni müharibəyə cürət etməyəcək. Digərləri isə tezliklə hərbi əməliyyatların başlayacağını proqnozlaşdırırlar. Azərbaycan müasir silahlara və hərbi texnikaya "milyardlarla dollar" xərcləyir. Bu, parad üçün deyil, Qarabağ müharibəsinin hərbi yolla həlli üçündür, hərbi şərhçi, "Ermənistan hərbi-sənaye kompleksi" bloqunun müəllifi Samvel Ağababyan hesab edir. Onun fikrincə, Ermənistanın və Dağlıq Qarabağın təhlükəsizliyinə xüsusi qorxunu operativ-taktiki və tank əleyhinə raket kompleksləri, raket-artilleriya silahları və baraj dronları yaradır. "Bu silahlar yüksək texnolojiliyi və uzaq məsafəliyi ilə Azərbaycan Silahlı Qüvvələrinə atəş kontaktına daxil olmadan dəqiq zərbələr endirməyə və effektiv hərbi əməliyyatlar aparmağa imkan verir", - S.Ağababyan "Kafkazskiy uzel"in müxbirinə açıqlama verib. O, erməni oxucuları inandırır ki, düşmən ordusu nə qədər güclü silahlansa da Ermənistan SQ azərbaycanlıların hücumlarını dəf edə və neytrallaşdıra bilər.

Yerevanın "Aravot" nəşrində Ermənistan və Dağlıq Qarabağ rəhbərliklərinə təlaşlı müraciət edilib. Müraciət müəllifi hüquq müdafiəçisi Karen Oğacanyan erməniləri onları gözləyən fəlakətlə qorxudur.

"Canlı qüvvə və texnikanın cəmləşməsinin yeganə məntiqi var: Artsax suveren dövlətinə qarşı genişmiqyaslı hərbi əməliyyatlara hazırlıq. Bir neçə dəfə Azərbaycan tərəfdən ciddi təxribat cəhdinin qarşısı Artsax ordusu tərəfindən alınıb. Azərbaycan böyük vəsait xərcləyir, öz ordusuna təlim keçir, ordunun günlük xərcləri bizim ordunun aylıq xərclərini ötür. Əlbəttə, Azərbaycan futbol üzrə Dünya Çempionatının başa çatmasını gözləyir ki, Rusiyanı qəzəbləndirməsin. Bununla bağlı Rusiya ilə danışıqların aparılması tamamilə aydındır, bunu Rusiyanın yüksək vəzifəli məmurlarının Bakıya və müvafiq olaraq onların da Moskvaya ekstren səfərlərindən bilmək olar.

Ermənistanın yeni rəhbərliyini bir qədər ayıltmaq məqsədilə Moskvanın hərbi əməliyyatlara razılıq verəcəyi istisna deyil. Moskva hələ də ona inamsız yanaşır, baxmayaraq ki, açıq şəkildə dostluq jestləri nümayiş etdirir.

Məni başqa bir şey qorxudur, erməni rəhbərliyinin süst davranışı, xüsusilə də Ermənistan Müdafiə Nazirliyinin Artsax və Ermənistan vətəndaşlarının fiziki təhlükəsizliyinə qorxu yaradan real faktlara laqeyd yanaşması. Düşmən tərəfindən genişmiqyaslı hərbi əməliyyatların bərpası zamanı mümkün fiziki və maddi itkinin azaldılması üçün heç bir tədbirin görülməməsi məni narahat edir. Ermənistanın diplomatik qurumu da fəaliyyət göstərmir, Azərbaycanın real niyyəti barədə dünya ictimaiyyəti məlumatlandırılmır. Fikrimcə, Artsax və Ermənistanın müvafiq qurumları arasında qarşılıqlı əlaqənin koordinasiyası itib. Bütün bunlar məni çox narahat edir. Bir vətəndaş və vətənpərvər kimi erməni xalqının milli təhlükəsizliyinə real təhdidləri görmək istəməyənlərin gözlərini açmağa, onları təkcə erməni xalqı üçün deyil, həm də Cənubi Qafqaz regionu üçün humanitar fəlakətə çevriləcək hərbi konfrontasiyanın qarşısının alınması üçün öz funksional öhdəliklərinə uyğun olaraq əməli tədbirlər görməyə çağırmağa çalışıram", - K.Oğacanyan yazır.

Hüquq müdafiəçisi K.Oğacanyan FB səhifəsində göstərdiyi fotoda Qarabağda erməni qoşunlarının mövqelərində hərbi avadanlıq quraşdırır və Avropa istehsallı snayper tüfəngini göstərir.

Azərbaycanın indiki təbliğat kampaniyasının özəlliyi belə bir fikrin yürüdülməsindən ibarətdir ki, 2016-cı il hadisələrindən fərqli olaraq, bu dəfə Kreml Azərbaycan SQ-nin hücumuna mane olmayacaq. Bu fikrə sübut kimi təkcə Naxçıvan korpusu qoşunlarının hərəkətilə bağlı Moskvanın susması göstərilmir, həm də Bakıda RF Dövlət Dumasının spikeri Volodinin Azərbaycanın konstruktiv Qarabağ siyasəti haqda təqdiredici bəyanatı da qeyd olunur.

Xatırladaq ki, spiker Volodin Bakıya Naxçıvan korpusu bölmələrinin Günnüt kəndi istiqamətində irəliləməsindən sonra gəlib. Volodinin sözləri Yerevanda kəskin narazılıq doğurub.

Azərbaycanın keçmiş xarici işlər naziri Tofiq Zülfüqarov Rusiyadakı ermənipərəst dairələrdən ehtiyatlanmamağı təklif edir, bildirir ki, Rusiyanın Azərbaycana qarşı güc tətbiq edəcəyinə inanmır. O, Turan-a müsahibəsində Ermənistanla danışıqları perspektivsiz adlandırıb və Rusiyadakı ermənipərəst dairələrdən çıxış etməməyə, Azərbaycan xalqının iradəsini yerinə yetirməyə çağırıb.

Məqalənin əvvəlində haqqında söz açdığımız videoçarxdan danışan T.Zülfüqarov Kipr münaqişəsi zamanı Türkiyə baş nazirinin kodlaşmış frazasını xatırladıb. Kipr danışıqları uğursuz başa çatdıqdan sonra Böyük Britaniyanı tərk edən baş nazir jurnalistlərə deyib: "İndi Ayşə tətilə çıxa bilər" (Ayşə Türkiyə hökumət başçısının qızı). Bu fraza Türkiyə Silahlı Qüvvələrinin Kiprdə yunan nasistlərinə qarşı əməliyyata başlaması barədə siqnal idi. Türk ordusu gəldi və öz işini gördü. Halbuki, bundan öncə yunanlar türkləri ələ salaraq "Sən gəlməz oldun" mahnısını səsləndirirdilər", - T.Zülfüqarov yada salıb.

Azərbaycanla Rusiya arasında gələcək müharibədə Rusiyanın mümkün iştirakına toxunan keçmiş nazir Ermənistanı Rusiyanın "qulpsuz çemodanı" adlandırıb. Çağdaş zamanda Ermənistan hərbi forpost kimi öz əhəmiyyətini itirib. Çünki strateji raketlər istənilən ən yüksək hədəfə çatır. Qərbyönlü Paşinyanın hakimiyyətə gəlişi isə Rusiyanın Qafqazdakı geosiyasi maraqlarının bələdçisi olmağa son qoyub. Hazırda Rusiyadan imtina edən Ermənistan başqa himayədar axtarır. "Yeni Ermənistan" Rusiyanın "hərbi çətiri"nin altında gizləndiyini düşünməyə davam edərək Dağlıq Qarabağdan kənar ərazilərə açıq iddia edir. Bu, əbədi davam edə bilməz. Moskvada daha Paşinyan Ermənistanının ambisiyalarını müdafiə etmək niyyətində deyillər. Rusiyanın hələ də "strateji tərəfdaşı"na soyuq və tənqidi münasibəti bu səbəbdəndir", -T.Zülfüqarov deyib.

"Həqiqət anı yaxınlaşır. Azərbaycan əvvəlki kimi zəif deyil, effektiv hərbi və dövlət quruculuğu nümayiş etdirir. Keçmiş prezident Levon Ter-Petrosyanın 1997-ci il noyabrın 1-də "Müharibə yoxsa sülh: Daha ciddi olmağın vaxtıdır" məqaləsində söylədiyi vaxt çatıb: "Bu gün rədd etdiyimiz şeyi gələcəkdə xahiş etməli olacağıq - bizim tariximizdə dəfələrlə baş verdiyi kimi", - T.Zülfüqarov Ter-Petrosyanın sözlərini xatırladıb.